महावृत्त

जम्मू-काश्मीरमध्ये हिमस्खलनात ५ जवान बेपत्ता

श्रीनगर -  जम्मू-काश्मीरमधील गुरेज भागात झालेल्या जोरदार हिमवृष्टीमध्ये लष्कराचे पाच जवान बेपत्ता झाल्याची माहिती लष्कराकडून देण्यात आली आहे. हे पाचही जवान कर्तव्यावर तैनात असताना ही घटना घडली. जवानांच्या बचावासाठी शोध अभियान सुरु करण्यात आले आहे. गेल्या जानेवारी महिन्यांत गुरेज भागातच १० जवान आणि ४ नागरिक बर्फाच्या वादळात ठार झाले होते. यापूर्वीही अशा प्रकारच्या अनेक घटनांमध्ये जवानांचा मृत्यू झाला होता.

बुबनाळच्या उल्लेखनीय वाटचालीचे माल्टात आंतरराष्ट्रीय मंचाकडून कौतुक

मुंबई - कोल्हापूर जिल्ह्यातील बुबनाळ गावाच्या उल्लेखनीय वाटचालीला माल्टा (युरोप) येथील परिषदेत विविध देशांकडून कौतुकाची थाप मिळाली; तसेच राज्य निवडणूक आयोगाने राबविलेल्या नावीन्यपूर्ण उपक्रमांबाबतही विविध देशांकडून कौतुक करण्यात आले. निमित्त होते राष्ट्रकुल स्थानिक स्वराज्य शासन मंचच्या (सीएलजीएफ) आंतरराष्ट्रीय परिषदेचे! राष्ट्रकुल स्थानिक स्वराज्य शासन मंच हा राष्ट्रकुल मंडळाचा उपक्रम असून त्यामध्ये ५३ देशांचा समावेश आहे. स्थानिक स्वराज्य संस्थांमधील लोकशाहीचे बळकटीकरण करणे, त्यांना तांत्रिक स्वरूपाची मदत करणे, संशोधन करणे आणि आंतरराष्ट्रीय परिषदांच्या माध्यमातून उल्लेखनीय कामे व अनुभवांची देवाणघेवाण करणे या उद्देशाने सी.एल.जी.एफ. कार्यरत आहे. सी.एल.जी.एफ. तर्फे दर दोन वर्षांनी आंतरराष्ट्रीय परिषदेचे आयोजन केले जाते.

अधिक वाचा:बुबनाळच्या उल्लेखनीय वाटचालीचे माल्टात आंतरराष्ट्रीय मंचाकडून कौतुक

महाराष्ट्र विधीमंडळाने अनेक क्रांतीकारक कायदे तयार केले : मुख्यमंत्री

नागपूर  - योग्य व उत्तम कायदे तयार करण्याचे काम विधीमंडळामार्फत करण्यात येत असून महाराष्ट्र विधीमंडळाने अनेक क्रांतीकारक कायदे तयार केले आहेत, असे प्रतिपादन मुख्यमंत्री देवेंद्र फडणवीस यांनी आज येथे केले.राष्ट्रकुल संसदीय मंडळ, महाराष्ट्र शाखेच्यावतीने आयोजित केलेल्या ४७ व्या संसदीय अभ्यासवर्गाचे उद्‌घाटन मुख्यमंत्र्यांच्या हस्ते करण्यात आले. त्याप्रसंगी मुख्यमंत्री बोलत होते. मुख्यमंत्री पुढे म्हणाले, महाराष्ट्र विधानमंडळाने माहिती अधिकार, सेवाहमी कायदा, जादूटोणा विरोधी कायदा, जात पंचायती विरोधी कायदा असे महत्वाचे कायदे तयार केले आहेत. अस्तित्वात असलेल्या कायद्यात आवश्यकतेनुसार विधीमंडळात चर्चा करुन सुधारणा करण्यात येते.

अधिक वाचा:महाराष्ट्र विधीमंडळाने अनेक क्रांतीकारक कायदे तयार केले : मुख्यमंत्री

राष्ट्रीय लोकअदालतीमध्ये २ लाख ४१ हजार ३८८ प्रकरणे निकाली

मुंबई - महाराष्ट्र राज्य विधी सेवा प्राधिकरणातर्फे आयोजित राष्ट्रीय लोकअदालतीमध्ये २ लाख ४१ हजार ३८८ प्रकरणे निकाली निघाली आहेत. प्रलंबित आणि दाखलपूर्व प्रकरणांचे राष्ट्रीय लोकअदालतीचे जिल्हा विधी सेवा प्राधिकरणे, तालुका विधी सेवा समित्या व उच्च न्यायालय विधी सेवा समिती ,मुंबई व उपसमित्या, नागपूर व औरंगाबाद येथे जिल्हा न्यायालय, तालुका न्यायालय, न्यायाधिकरणचे आयोजन करण्यात आले होते. प्रलंबित १ लाख ९२ हजार ४४८ प्रकरणांपैकी ४१ हजार १९३ प्रकरणे तर खटलापूर्व ८ लाख ५० हजार ५६८ पैकी २ लाख १९५ प्रकरणे निकाली काढण्यात आली आहे.

अधिक वाचा:राष्ट्रीय लोकअदालतीमध्ये २ लाख ४१ हजार ३८८ प्रकरणे निकाली